10 Ali Baba 1: Ali Baba in spelunca latronum

Haec fabula de fratribus Ali Baba Kassimoque narrat. Ali Baba vir bonus et humanus, Kassim vero avidus et avarus evasit. Ali Baba feminam pauperem sed probam, Kassim vero filiam divitem cuiusdam mercatoris in matrimonium duxit. Alter lignum in foro venum dans uxori et filio victum tenuem praebuit, alter merces pretiosas in taberna sua venum dans brevi magnas divitias sibi comparavit.

Quodam die Ali Baba cum in silva lignum colligeret, nubem pulveris procul animadvertit. Brevi latrones equo vehentes apparuerunt. Ali Baba perterritus in arborem quandam conscendit. Latrones sub ipsa arbore constiterunt. Ali Baba quadraginta latrones fortes et incultos numeravit. Equi saccos graves vexerunt, haud dubie praedam continentes. Dux latronum ex equo descendit. Circumspexit, ne quis spectaret. Arbor Ali Babae fuit iuxta montem. Dux latronum magna voce monti dixit:

Sesam, aperire!

Mons intonuit, se aperuit. Ali Baba miraculo obstupuit. Dux latronum et omnes latrones ordine in montem inierunt. Denique mons tonitruo se clausit. Moram longam Ali Baba tulit, dum latrones e monte exierunt. Dux voce magna dixit: Sesam, claudere! Mons se clausit. Latrones equos conscenderunt, equo vehentes evanuerunt. Ali Baba ex arbore descendit. Num valent verba magica cum dico ego? Tremulo corde ante montem constitit.

Sesam, aperire! Simulatque dixit, mons se aperuit. Ali Baba miraculo obstupuit, tum tremulus in speluncam intravit. Spelunca magnam admirationem movit. Ubique aurum, argentum, margaritae: thesaurus regalis ille fuit. Ali Babam thesauri splendor ita cepit ut montem se claudere non animadverteret. Postremo mentem collegit. "Vir pauper sum. Non potest fieri ut latrones animadvertant hinc abesse paucas margaritas paullulumque auri, quod nunc aufero, ut miseram fortunam nostram sublevem ." Ita partem exiguam thesauri auferens domum rediit.